平均律

平均律（英文：equal temperament）係調律一種，指將一個八度分做若干等分。平均律可以話係一種妥協，好處係是但一編樂章，用同一件樂器，可以用是但一個音階彈，聽落都一樣同大致正常，唔好處係技術上可能會走音，因為例如喺西方嘅傳統音階裏面，每個音嘅音高其實並唔係平均分佈。

最常見嘅平均律係十二平均律，另外亦有十九平均律、廿四平均律等等；電子音樂用嘅音分單位亦可以視為係1200平均律。

十二平均律

十二平均律（英文：twelve-tone equal temperament，簡稱 12-TET、12EDO、12-ED2）喺平均律一種，將一個八度平均分做 12 等分，對應西方傳統嘅 12 個半音。一個八度嘅頻率比例係 $1:2$，所以 $n$ 個半音嘅音程嘅頻率比例係 $1:2^{\frac {n}{12}}$。電子樂器同音樂軟件通常係用十二平均律，現代嘅其他西方樂器亦通常係用十二平均律。