保留字

保留字（英文：reserved word），喺程式語言，係指語法專用、有特定意思嘅字詞，呢啲字詞（視乎語言）通常或者一定唔可以用嚟做任何其他用途；亦即係變數、子程式、物件等等嘅嘢通通唔可以改呢啲名。

程式語言未必有保留字，例如 PostScript 就一個保留字都冇；語法用嘅 if、ifelse、def、add 等等全部都只係普通嘅識別碼，不過呢啲識別碼都係擺喺系統專用嘅關聯陣列入面，普通程式唔會影響到。

例

喺 C，if 係保留字，變數唔可以叫 if，int if = 0; 係語法錯誤。

喺 Apple II 嘅 Applesoft BASIC，變數名都要加前綴，但係保留字喺輸入途中會即刻變二進制代碼，所以所有保留字都唔用得嚟做變數名；例如 $IF 係無效變數名，因為 IF 會變二進制代碼，而二進制代碼並唔係變數名可以用嘅合法字元。喺呢隻語言甚至連 $IFF、$IIF、$IIFF 等等含有 IF 嘅名都唔用得，中間嘅 IF 會變二進制代碼。

反例

PostScript 冇保留字，0 /if def 係合法語句，執行之後會有一個代表 0 嘅一個普通變數 if，但係因為同有優先次序嘅條件陳述式撞名，用呢個變數會好麻煩。

Perl 有所謂關鍵字，但係詞法分析會睇埋前綴，$if 係合法變數名。